Reuter ៖ កាលពី​ថ្ងៃ​អង្គា​រ៍ ​ប្រធាន​ចារកម្ម​រុ​ស្ស៊ី​បាន​បដិសេធ​ការ​ទទួលខុសត្រូវ​ចំពោះ​ការ​វាយប្រហារ​តាម​ប្រព័ន្ធ​អ៊ិ​ន​ធឺ​ណេ​តទៅ​លើ​ក្រុមហ៊ុន​ SolarWinds​ (SWI.N)​ ដោយ​បាន​និយាយ​ថា​ លោក​ត្រូវ​បាន ​“​បញ្ចើចបញ្ចើ​”​ ដោយសារ​ការ​ចោទប្រកាន់​របស់​សហរដ្ឋអាមេរិក​ និង​ចក្រភព​អង់គ្លេស​ថា​ អង្គភាព​ចារកម្ម​បរទេស​របស់​រុ​ស្ស៊ី​ដែល​នៅ​ពីក្រោយ​ការ​វាយប្រហារ​បែប​បច្ចេកវិទ្យា​ទំនើប​។​

​សហរដ្ឋអាមេរិក​ និង​ចក្រភព​អង់គ្លេស​បាន​ស្តីបន្ទោស​សេវាកម្ម​ស៊ើបការណ៍​សម្ងាត់​បរទេស​របស់​រុ​ស្ស៊ី​ (SVR)​ ដែល​ជា​អ្នក​បន្តវេន​ប្រតិបត្តិការ​ចារកម្ម​បរទេស​របស់​ KGB​ ចំពោះ​ការ​វាយប្រហារ​បែប​បច្ចេក​វិទ្យា​ទំនើប​ ដែល​បាន​ធ្វើ​ឲ្យ​ប៉ះពាល់​ដល់ទី​ភ្នាក់ងារ​សហព័ន្ធ​សហរដ្ឋអាមេរិក​ចំនួន​០៩​ និង​ក្រុមហ៊ុន​វិស័យ​ឯកជន​រាប់រយ​ផ្សេង​ទៀត​។​

​លោក ​Sergei​ Naryshkin​ ជា​ប្រធាន​សេវាកម្ម​ស៊ើបការណ៍​សម្ងាត់​ SVR​ ដែល​ជា​មិត្ត​ជិត​ស្និទ្ធ​របស់​ប្រមុខ​វិមាន​ក្រឹម​ឡាំង​លោក​ប្រធានាធិបតី​ Vladimir​ Putin​ បាន​និយាយ​ប្រាប់​សារព័ត៌មាន​BBC​ជា​ភាសា​រុ​ស្ស៊ី​ថា​“​ការ​អះអាង​ទាំងនេះ​ គឺ​ដូច​ជា​រឿង​ប្រលោមលោក​អ្នកស៊ើប​អង្កេត​ដ៏​អាក្រក់​”​។​

​នៅ​ពេល​សួរ​ដោយ​ផ្ទាល់​ប្រសិនបើ​សេវាកម្ម​ស៊ើបការណ៍​សម្ងាត់​ SVR​ ទទួលខុសត្រូវ​ចំពោះ​ការ​វាយប្រហារ​លើ​ក្រុមហ៊ុន​ SolarWinds​ លោក​Naryshkin​ បាន​និយាយ​ទាំង​ស្នាមញញឹម​ថា​លោក​នឹង​ត្រូវ​បាន​“​បញ្ចើចបញ្ចើ​”​ប្រសិនបើ​សេវាកម្ម​ស៊ើបការណ៍​សម្ងាត់​ SVR​ ទទួលខុសត្រូវ​ចំពោះ​ការ​វាយប្រហារ​បែប​បច្ចេកវិទ្យា​ទំនើប​ ប៉ុន្តែ​លោក​មិន​អាច​“​ទាមទារ​សមិទ្ធិ​ផល​ច្នៃប្រឌិត​របស់​អ្នក​ដទៃ​ធ្វើ​ជា​របស់​រូប​លោក​ផ្ទាល់​បាន​ទេ​”​។​

​លោក​ Naryshkin​ បាន​និយាយ​ថា​ លោក​មិន​ចង់​ចោទប្រកាន់​សហរដ្ឋអាមេរិក​ថា​ជា​អ្នក​នៅ​ពីក្រោយ​ការ​វាយប្រហារ​នោះ​ទេ​ ប៉ុន្តែ​បាន​ដកស្រង់​សម្តី​ពី​ឯកសារ​ដែល​បែកធ្លាយ​ដោយ​អតីតមន្ត្រី​ជាប់កិច្ចសន្យា​ទីភ្នាក់ងារ​សន្តិសុខ​ជាតិ​លោក​ Edward​ Snowden​ ដោយ​លើក​ឡើង​ថា​ជា​យុទ្ធសាស្ត្រ​នៃ​ការ​វាយប្រហារ​ គឺ​ស្រ​ដៀង​ទៅ​នឹង​អ្វី​ដែល​ទីភ្នាក់ងារ​ស៊ើបការណ៍​សម្ងាត់​សហរដ្ឋអាមេរិក​ និង​អង់គ្លេស​ធ្លាប់​បាន​ប្រើប្រាស់​ពី​មុន​មក​៕